Fógraíocht agus Margaíocht
Ceapaimid go léir go bhfuilimid saor ó thionchar chumhacht na fógraíochta agus na margaíochta ach de dhéanta na fírinne, nílimid. Smaoinigh faoi mhéid an ábhair fógraíochta a fheiceann tú gach lá. Imríonn cláir fógraí, teilifís, raidió, irisí, post díreach, suíomhanna gréasáin, taispeáintí in aghaidheanna siopaí go léir tionchar ar ár gcinntí agus éadaí, bia, carranna, ceol agus gnáthrudaí á gceannach againn. Téann an fhógraíocht i gcion fiú ar na háiteanna a roghnaímid dár laethanta saoire.
Is iad feidhmeanna na Fógraíochta agus na Margaíochta ná buntáistí táirgí a léiriú dúinn, na tomhaltóirí. Ní mór don mhargaíocht mhaith ár n-aird a mhealladh, fanacht ar ár n-intinn againn agus, an rud is tábhachtaí, dul i gcion orainn ionas go gceannóimis an táirge.
Cé go gceapann a lán daoine gurb ionann “an Mhargaíocht” agus an Fhógraíocht ní hionann. Níl san fhógraíocht ach ceann de na gníomhaíochtaí gnó a bhaineann leis an Margaíocht.
Socraíonn comhlacht a dhéanann táirge nó seirbhís ar cad is mian leis an gcustaiméir i dtús báire. Ansin forbraíonn sé an táirge nó an tseirbhís sin bunaithe ar na riachtanais agus na mianta sin. Déantar a lán taighde ar thoil, neamhthoil agus roghanna na gcustaiméirí sa mhargaíocht. Aithníonn an mhargaíocht cé hé nó hí an custaiméir. Is é sin cé na grúpaí sa tsochaí ar chóir na táirgí a dhíriú orthu.
Ansin baintear úsáid as straitéisí margaíochta chun na táirgí seo a fhógairt agus a chur le chéile sa chaoi go mbeidh siad cairdiúil don úsáideoir agus tarraingteach dá spriocghrúpa tomhaltóirí. Úsáidtear taighde margaidh go forleathan freisin chun ‘íomhá’ a aimsiú a bheidh tarraingteach dúinn, na tomhaltóirí. Péire jíons, fón póca, laethanta saoire thar lear, carr – is minic a cheannaítear na rudaí sin bunaithe ar an íomhá atá acu agus ar an dóigh a mhothaímid mar thoradh orthu seachas aon rud eile.
De bharr tabhairt isteach na teilifíse digití agus fás na gcumarsáidí soghluaiste agus idirlín tá an Mhargaíocht ag teacht chun bheith ina gníomhaíocht idirnáisiúnta. Is cinnte go bhfuil méadú ar chumas comhlachtaí Éireannacha a dtáirgí nó a seirbhísí a dhíol le margadh ollmhór domhanda mar thoradh ar úsáid níos mó na teicneolaíochta cumarsáide. Ach tá méadú ar an iomaíocht ó chomhlachtaí timpeall an domhain freisin mar gheall ar an teicneolaíocht.
Caidreamh Poiblí
Is disciplín é caidreamh poiblí atá dírithe ar chlú agus a bhfuil sé d’aidhm aige tuiscint agus tacaíocht a thuilleamh agus tionchar a imirt ar thuairimí agus ar iompraíocht.
Go bunúsach, is éard atá ann ná iarracht phleanáilte mharthanach ar cháilmheas a bhunú agus a chaomhnú idir eagraíocht agus na luchtanna atá tábhachtach di. Áirítear sna luchtanna seo – ar a dtugtar pobail freisin – custaiméirí, idir chustaiméirí reatha agus ábhar custaiméara, infheisteoirí, an rialtas, soláthraithe agus múnlóirí meoin.
|
|
|
|
1 o 3
